ಈಗಿನ ಬೆಂಗಳೂರು ಇರುವ ಪ್ರದೇಶವನ್ನು ಹಲವಾರು ರಾಜರು ಅಥವಾ ರಾಜ ವಂಶಸ್ಥರುಗಳು ಆಳಿದ್ದಾರೆ. ಮೊದಲಿಗೆ ಚೋಳರಿಂದ ಶುರುವಾಗಿ ಗಂಗರು, ಹೊಯ್ಸಳರು ಮತ್ತು ವಿಜಯನಗರ ಸಾಮ್ರಾಜ್ಯದವರೆಗೆ ಎಲ್ಲಾರು ಬೆಂಗಳೂರಿನ ಬೆಳವಣಿಗೆಯಲ್ಲಿ ತಮ್ಮದೇ ಕೊಡುಗೆಯನ್ನು ನೀಡಿದ್ದಾರೆ. ಕೆಂಪೇಗೌಡ ವಿಜಯನಗರ ಸಾಮ್ರಾಜ್ಯದ ಒಂದು ಭಾಗ.

ಕ್ರಿ. ಶ. 1537ರಲ್ಲಿ ಕೆಂಪೇಗೌಡ ತನ್ನ ರಾಜಧಾನಿಯನ್ನು ಯಲಹಂಕದಿಂದ ಬೆಂಗಳೂರಿಗೆ ಸ್ಥಳಾಂತರ ಮಾಡಿದ ನಂತರದ ಕಾಲಘಟ್ಟದಲ್ಲಿ ಬೆಂಗಳೂರು ಹೆಚ್ಚು ಅಭಿವೃದ್ಧಿಗೊಳ್ಳತೊಡಗಿತು. ಆಗಿನ ಬೆಂಗಳೂರಿನ ಅಭಿವೃದ್ಧಿಯನ್ನು ಗಮನಿಸಿದ ವಿಜಯನಗರ ಅರಸನಾಗಿದ್ದ ಕೃಷ್ಣದೇವರಾಯನ ತಮ್ಮನಾದ ಅಚ್ಯುತರಾಯನಿಗೆ ಈ ವಿಷಯ ತಿಳಿದು ಸಂತೋಷಗೊಂಡು ಬೆಂಗಳೂರಿನ ಸುತ್ತಮುತ್ತಲಿನ ಗ್ರಾಮಗಳನ್ನು ಕೆಂಪೇಗೌಡನಿಗೆ ದಾನವಾಗಿ ಕೊಟ್ಟನು. ಅವುಗಳೆಂದರೆ ಉತ್ತರ ಭಾಗಕ್ಕೆ ಹೆಸರಘಟ್ಟ ಮತ್ತು ಚಿಕ್ಕಬಾಣವಾರ. ದಕ್ಷಿಣಕ್ಕೆ ವರ್ತೂರು, ಬೇಗೂರು, ತಲಘಟ್ಟಪುರ, ಕುಂಬಳಗೂಡು ಮತ್ತು ಕೆಂಗೇರಿ. ಆನೇಕಲ್ ಗೆ ಸೇರಿರುವ ಜಿಗಣಿಯನ್ನು ಸಹ ದಾನವಾಗಿ ಕೊಟ್ಟಿರುವ ಉಲ್ಲೇಖಗಳಿವೆ.

ವಿಜಯನಗರದ ಅರಸರಿಂದ ಕೆಂಪೇಗೌಡರಿಗೆ ದಾನವಾಗಿ ಬಂದಂತಹ ಪ್ರದೇಶದಲ್ಲಿ ನಮ್ಮ ಅಧ್ಯಯನ ಕ್ಷೇತ್ರದ ಪಂಚಾಯಿತಿಗಳಾದ ಜಿಗಣಿ ಹೋಬಳಿಯ ರಾಗಿಹಳ್ಳಿ ಗ್ರಾಮ ಪಂಚಾಯಿತಿ ಮತ್ತು ಮಂಟಪ ಗ್ರಾಮ ಪಂಚಾಯಿತಿಗಳು ಇರುವುದನ್ನು ಗಮನಿಸಬಹುದು. ಇಲ್ಲಿ ಈ ಇತಿಹಾಸದ ಕತೆಯ ಹಿನ್ನೆಲೆ ಏಕೆಂದರೆ, ಅಧ್ಯಯನ ಪ್ರದೇಶದಲ್ಲಿನ ಕೆಲವು ಕಾಮನ್ಸ್ ಗಳ ಚರಿತ್ರೆ ಸುಮಾರು 500 ವರ್ಷಗಳ ಇತಿಹಾಸವನ್ನು ಹೊಂದಿರುವುದು.

ಈ ಎರಡು ಗ್ರಾಮ ಪಂಚಾಯಿತಿಗಳು ವಿಭಿನ್ನ ರೀತಿಯ ನೈಸರ್ಗಿಕ ಭೂದೃಶ್ಯಗಳನ್ನು ಹೊಂದಿವೆ. ರಾಗಿಹಳ್ಳಿ ಗ್ರಾಮ ಪಂಚಾಯಿತಿಯು ಬನ್ನೇರುಘಟ್ಟ ರಾಷ್ಟ್ರೀಯ ಉದ್ಯಾನವನದಿಂದ ಸುತ್ತುವರೆದಿದ್ದು ನಗರೀಕರಣದಿಂದ ದೂರ ಉಳಿದಿದೆ. ಆದರೆ ಮಂಟಪ ಗ್ರಾಮ ಪಂಚಾಯಿತಿಯು ಉತ್ತರಕ್ಕೆ ಇರುವ ನಗರ ಪ್ರದೇಶಕ್ಕೆ ಹೊಂದಿಕೊಂಡಂತೆಯೇ ಇದ್ದು, ದಕ್ಷಿಣಕ್ಕೆ ಬನ್ನೇರುಘಟ್ಟ ರಾಷ್ಟ್ರೀಯ ಉದ್ಯಾನವನವನ್ನು ಹೊಂದಿದೆ. ಈ ಎರಡು ಅಧ್ಯಯನ ಕ್ಷೇತ್ರಗಳಲ್ಲಿಯೂ ಮಾನವಜನ್ಯ ಚಟುವಟಿಕೆಗಳಿಂದ ಭೂ ಹೊದಿಕೆಯ ಬದಲಾವಣೆಯನ್ನು ಸಾಕಷ್ಟು ಕಾಣಬಹುದು.

ರಾಗಿಹಳ್ಳಿ ಗ್ರಾಮ ಪಂಚಾಯಿತಿಯ ಅಧ್ಯಯನ ಪ್ರದೇಶವು 12°42'2.32"N ಉತ್ತರ ಅಕ್ಷಾಂಶದಿಂದ 12°45'29.57"N ಉತ್ತರ ಅಕ್ಷಾಂಶದವರಿಗೆ ಮತ್ತು 77°33'24.81"E ಪೂರ್ವ ರೇಖಾಂಶದಿಂದ 77°35'48.50"E ಪೂರ್ವ ರೇಖಾಂಶದವರಿಗೆ ಕಂಡುಬರುತ್ತದೆ. ಮಂಟಪ ಗ್ರಾಮ ಪಂಚಾಯಿತಿಯ ಅಧ್ಯಯನ ಪ್ರದೇಶವು 12°46'39.64"N ಉತ್ತರ ಅಕ್ಷಾಂಶದಿಂದ 12°50'19.96"N ಉತ್ತರ ಅಕ್ಷಾಂಶದವರಿಗೆ ಮತ್ತು 77°34'52.47"E ಪೂರ್ವ ರೇಖಾಂಶದಿಂದ 77°37'25.19"E ಪೂರ್ವ ರೇಖಾಂಶದವರಿಗೆ ಕಂಡುಬರುತ್ತದೆ.